CR Patil Response to Bilawal Bhutto Threat : સિંધુ નદી મુદ્દે બિલાવલની ધમકી પર પાટીલનો કડક જવાબ: ભારત હવે શાંત નહીં રહે
CR Patil Response to Bilawal Bhutto Threat : જમ્મુ-કાશ્મીરના પહેલગામમાં પાકિસ્તાન આધારિત આતંકીઓએ કરેલા આતંકી હુમલામાં 26 નિર્દોષ લોકોને ભોગ બનવું પડ્યું. આ દૂઃખદ ઘટના બાદ ભારત સરકારે પાકિસ્તાન સામે પગલા ભરવાનું નક્કી કર્યું છે અને સિંધુ જળસંધિ (Indus Water Treaty)ને સ્થગિત કરવાનો મહત્વપૂર્ણ નિર્ણય લીધો છે. ભારતના આ સખત નિર્ણયથી પાકિસ્તાનમાં ખળભળાટ મચી ગયો છે અને તેના નેતાઓમાં ઉહાપોહ સર્જાયો છે.
બિલાવલ ભુટ્ટોનું વિવાદાસ્પદ નિવેદન
સિંધુ જળસંધિ પર ભારતના નિર્ણય પછી, પાકિસ્તાન પીપલ્સ પાર્ટી (PPP)ના પ્રમુખ બિલાવલ ભુટ્ટો ઝરદારીને ઉગ્ર પ્રતિક્રિયા આપીને વિવાદ ઊભો કર્યો. બિલાવલે નિવેદન આપ્યું કે, “સિંધુ નદીમાં કાં તો પાકિસ્તાનનું પાણી વહેશે કે કાં ભારતીયોનું ખૂન વહેશે.” બિલાવલના આવા ઝેર ભરેલા શબ્દો ભારતના શાસકો સુધી પહોંચ્યા અને મજબૂત જવાબ આપવામાં આવ્યો.
કેન્દ્રીય મંત્રી સી.આર. પાટીલનો કડક જવાબ
ભારતના કેન્દ્રીય જળશક્તિ મંત્રી સી.આર. પાટીલ, સુરતમાં આયોજિત એક કાર્યક્રમમાં, બિલાવલના નિવેદન પર પ્રત્યુત્તર આપતાં જણાવ્યું કે, “અમે લુખ્ખી ધમકીઓથી ડરતા નથી. જો તારે તાકાત હોય તો આવી જા.” પાટીલના આ શબ્દોએ સ્પષ્ટ સંદેશ આપ્યો કે ભારત હવે ધમકીઓથી નહીં ડરતું અને પોતાનું પાણી અને હક રક્ષવા માટે પૂરતી તાકાત ધરાવે છે.
સિંધુ જળસંધિનો ઇતિહાસ અને તેની મહત્વતા
1960માં પંડિત જવાહરલાલ નહેરુ અને પાકિસ્તાનના તત્કાલીન રાષ્ટ્રપતિ અયુબ ખાન વચ્ચે વિશ્વ બેંકના માધ્યમથી સિંધુ જળસંધિ પર હસ્તાક્ષર થયા હતા. આ સંધિ મુજબ, ભારતને રાવી, બિયાસ અને સતલજ નદીઓ પર અને પાકિસ્તાનને સિંધુ, ઝેલમ અને ચિનાબ નદીઓના પાણીઓ પર અધિકાર મળ્યો હતો. સંધિનો મુખ્ય હેતુ હતો કે બંને દેશો વચ્ચે પાણી મુદ્દે સંઘર્ષ ન થાય અને ખેતી કાર્ય અવરોધરહિત ચાલે.
પાકિસ્તાન માટે વધતું પાણીનું સંકટ
ભારતના તાજેતરના પગલાંથી પાકિસ્તાન માટે નવી સમસ્યાનો આરંભ થયો છે. પાકિસ્તાનની 80% ખેતી સિંધુ નદી સિસ્ટમ પર નિર્ભર છે. પાણી પૂરવઠામાં અડચણ આવતાં પાકિસ્તાનમાં ખેતી, પીવાનું પાણી અને વીજ ઉત્પાદન ક્ષેત્રે ગંભીર અસર થવાની શક્યતા છે. ખાસ કરીને પાકિસ્તાનના ઘણા હાઇડ્રો પ્રોજેક્ટ્સ અને ડેમ પર આ સિસ્ટમ આધારિત છે, તેથી હવે વીજળીની તંગી અને ઔદ્યોગિક મંદી સર્જાવાની આશંકા છે.
ભવિષ્યમાં ભારતનો અભિગમ સ્પષ્ટ
પ્રધાનમંત્રી નરેન્દ્ર મોદીના નેતૃત્વ હેઠળ ભારતે સ્પષ્ટ સંદેશો આપ્યો છે કે હવે આતંકવાદ અને વાતચીત સાથેના સંબંધો એકસાથે શક્ય નથી. ભારતે દરેક આંતરરાષ્ટ્રીય મંચ પર પાકિસ્તાનના આતંકવાદી મૂવમેન્ટના ઘાટને ઉજાગર કર્યો છે. સિંધુ જળસંધિ પરનો નવો અભિગમ પણ એ જ દિશામાં એક મજબૂત પગલું છે, જે બતાવે છે કે હવે ભારત પોતાની સુરક્ષા અને હિતો પર કોઈપણ પ્રકારની બાંધછોડ નહીં કરે.
