Ayodhya Ram Mandir રામ મંદિર સહિત યુપીના 15થી વધુ જિલ્લાઓને ઇમેઇલ દ્વારા બોમ્બ ધમકી, પોલીસ સતર્ક
Ayodhya Ram Mandir અયોધ્યામાં રામ મંદિર સહિત ઉત્તર પ્રદેશના અનેક જિલ્લાઓને ધમકીભર્યા ઇમેઇલ મળ્યા છે, જેના કારણે સુરક્ષા એજન્સીઓ ચિંતિત બની ગઈ છે. મળતી માહિતી મુજબ, આ ધમકીઓ યૂપીના 10 થી 15 જિલ્લાઓના જિલ્લા મેજિસ્ટ્રેટને અને રામ મંદિર ટ્રસ્ટને તેમના સત્તાવાર ઇમેઇલ પર મોકલવામાં આવી છે.
રામ મંદિરને ઉડાવી દેવાની ધમકી
અયોધ્યાના રામ જન્મભૂમિ ટ્રસ્ટના ઇમેઇલ પર ગઇ સોમવારની રાત્રે એક ઇમેઇલ મળ્યો હતો, જેમાં સ્પષ્ટ શબ્દોમાં લખ્યું હતું કે “મંદિરની સુરક્ષા વધારવી પડશે, નહીંતર તેને બોમ્બથી ઉડાવી દેવામાં આવશે.” આ શંકાસ્પદ ઇમેઇલ મળ્યા બાદ તરત જ અયોધ્યા સાયબર પોલીસ સ્ટેશનમાં એફઆઈઆર દાખલ કરવામાં આવી છે અને તપાસ શરૂ થઈ ગઈ છે.
અન્ય જિલ્લામાં પણ તણાવ
આવાં જ ધમકીભર્યા ઇમેઇલ બારાબંકી, ચંદૌલી, અલીગઢ સહિત અનેક જિલ્લાઓના કલેક્ટરોને પણ મળ્યા છે. ધમકીના પગલે, આ જિલ્લાઓમાં સુરક્ષા વ્યવસ્થા વધારી દેવામાં આવી છે. બોમ્બ સ્ક્વોડ, ડોગ સ્ક્વોડ અને સ્થાનિક પોલીસ દ્વારા સરકારી કચેરીઓ અને અગત્યના સ્થળોએ તપાસ હાથ ધરાઈ છે.
ધમકીનું સ્ત્રોત તમિલનાડુ?
પ્રાથમિક તપાસમાં સામે આવ્યું છે કે આ ઇમેઇલ્સ તમિલનાડુમાંથી મોકલવામાં આવ્યા છે. સાયબર સેલ અને ગુપ્તચર એજન્સીઓ હવે ઈમેઇલ મોકલનારના IP ઍડ્રેસ સહિત ટેકનિકલ વિગતોની તપાસ કરી રહી છે.
અલીગઢ અને અન્ય સ્થળોએ સુરક્ષા ચુસ્ત
અલીગઢના કલેક્ટર કચેરી પર પણ ધમકી મળ્યા બાદ તુરંત ચુસ્ત કાર્યવાહી શરૂ કરાઈ છે. ડી.એમ. ઓફિસની આસપાસ પોલીસ બંદોબસ્ત વધારવામાં આવ્યો છે અને અધિકારીઓએ લોકોમાં ભય ન ફેલાય એ માટે સ્થિતિ પર નજર રાખી છે.
આ પ્રકારની ધમકીઓ રાષ્ટ્રીય સુરક્ષા માટે ગંભીર છે. રામ મંદિર જેવાં ધાર્મિક રીતે સંવેદનશીલ સ્થળોને ધમકી મળવી એ માત્ર એક શહેર માટે નહીં, પણ સમગ્ર દેશ માટે ચિંતાનો વિષય છે. હાલ, કેન્દ્ર અને રાજ્યની સુરક્ષા એજન્સીઓ આ મામલે કોઈ પણ ઢીળાઇ રાખ્યા વિના કડક કાર્યવાહી કરવા માટે તત્પર છે.
