Shambhu border શંભુ બોર્ડર પર પોલીસની બુલડોઝર કાર્યવાહી,અનેક વિસ્તારોમાં ઇન્ટરનેટ બંધ, બોર્ડર પર ખેડુતો ઉમટી પડ્યા
Shambhu border પંજાબની માન સરકાર સામે ખેડુતો વિફર્યા છે, તો સાથ સાથ કેન્દ સરકાર સામે પણ ખેડુતોએ બાંયો ચઢાવી છે. શંભુ અને ખાનૌરી બોર્ડર પરથી ખેડૂતોને હટાવ્યા બાદ, કિસાન મજૂર સંઘર્ષ સમિતિના નેતા સતનામ સિંહ પન્નુએ AAP અને કેન્દ્ર સરકાર પર આકરા પ્રહારો કર્યા. તેમણે કહ્યું કે ભગવંત માન સરકારે મોદી સરકાર સાથે મળીને ખેડૂતો પર અત્યાચાર ગુજાર્યો છે અને તેને આની ભારે કિંમત ચૂકવવી પડશે. પન્નુએ જાહેરાત કરી કે ખેડૂતો સામે કરવામાં આવેલી કાર્યવાહી સામે પંજાબ અને હરિયાણાના ડેપ્યુટી કમિશનરોની કચેરીઓની બહાર વિરોધ પ્રદર્શન કરવામાં આવશે. વિપક્ષ પહેલાથી જ AAP અને BJP પર ખેડૂતો સાથે છેતરપિંડીનો આરોપ લગાવી ચૂક્યું છે, હવે ખેડૂત સંગઠનોએ પણ આંદોલનને વધુ ઉગ્ર બનાવવાની ચેતવણી આપી છે.
વિપક્ષનો મોટો હુમલો: ‘આપ સરકારે ખેડૂતો સાથે દગો કર્યો’
પંજાબ પોલીસ દ્વારા ખેડૂત નેતાઓની ધરપકડ અને શંભુ-ખનૌરી સરહદ ખાલી કરાવવાના મામલે વિપક્ષે આમ આદમી પાર્ટી (AAP) સરકાર પર આકરા પ્રહારો કર્યા છે. ભાજપના નેતા અમિત માલવિયાએ કહ્યું કે જે પાર્ટી દિલ્હીમાં ખેડૂતોનું સમર્થન કરી રહી હતી તે હવે પંજાબમાં તેમના તંબુઓ પર બુલડોઝર ચલાવી રહી છે. કોંગ્રેસના નેતા રણદીપ સુરજેવાલાએ તેને ‘ખેડૂતો સાથે મહાભારત જેવો વિશ્વાસઘાત’ ગણાવ્યો. પૂર્વ મુખ્યમંત્રી ચરણજીત સિંહ ચન્નીએ કહ્યું કે AAP અને ભાજપ બંને ખેડૂતો વિરુદ્ધ એક થયા છે. અકાલી દળે એવો પણ આરોપ લગાવ્યો હતો કે ભગવંત માન સરકારે ખેડૂતો સાથે દગો કર્યો છે અને આ કાર્યવાહી કેન્દ્ર સરકારના દબાણ હેઠળ કરવામાં આવી છે. વિપક્ષી પાર્ટીઓએ આને ખેડૂતોના અધિકારોનું ઉલ્લંઘન ગણાવ્યું છે અને આંદોલનને વધુ ઉગ્ર બનાવવાની ચેતવણી આપી છે.
શંભુ બોર્ડર પર બુલડોઝર, પોલીસે ખેડૂતોના બેરિકેડ હટાવ્યા
હરિયાણા-પંજાબ શંભુ બોર્ડર પર મોટી પોલીસ કાર્યવાહી ચાલી રહી છે. બુલડોઝરની મદદથી, હરિયાણા પોલીસે ખેડૂતોની અવરજવરને રોકવા માટે લગાવવામાં આવેલા કોંક્રિટ બેરિકેડ દૂર કર્યા.
શંભુ અને ખાનૌરી બોર્ડર ખાલી કરાઈ
પંજાબ સરકાર એક વર્ષ પછી એક્શનમાં આવી અને કોઈપણ ચેતવણી વિના બુલડોઝર વડે ખેડૂતોના તંબુ હટાવી દીધા. શંભુ અને ખાનૌરી સરહદો પર અનેક બુલડોઝર તૈનાત કરવામાં આવ્યા હતા, જે કલાકો સુધી ખેડૂતોના કામચલાઉ આશ્રયસ્થાનો તોડી પાડતા રહ્યા. આ અચાનક કાર્યવાહીથી ખેડૂતો ચોંકી ગયા. પંજાબ પોલીસે બંને સરહદો પર એક સાથે હુમલો કર્યો અને ખેડૂતોને ભગાડી દીધા. આ દરમિયાન 200 થી વધુ ખેડૂતોની અટકાયત કરવામાં આવી હતી અને ઇન્ટરનેટ સેવાઓ બંધ કરવામાં આવી હતી. ખેડૂત સંગઠનોએ આ કાર્યવાહીનો વિરોધ કર્યો છે અને કહ્યું છે કે તેઓ ટૂંક સમયમાં નવી રણનીતિ જાહેર કરશે.
