Reliance Industries: રિલાયન્સની જામનગર રિફાઇનરીને 25 વર્ષ પૂર્ણ, કંપનીએ યુવાન ‘મુકેશ અંબાણી’નો વીડિયો શેર કર્યો
Reliance Industries: રિલાયન્સ ઈન્ડસ્ટ્રીઝની જામનગર રિફાઈનરીએ વિશ્વની સૌથી મોટી રિફાઈનરીમાં 25 વર્ષ પૂર્ણ કર્યા છે. જામનગર રિફાઈનરીની શરૂઆત 28 ડિસેમ્બર 1999ના રોજ કરવામાં આવી હતી અને આ ઐતિહાસિક અવસર પર રિલાયન્સ ઈન્ડસ્ટ્રીઝે સોશિયલ મીડિયા પર એક વીડિયો જાહેર કર્યો છે, જેમાં કંપનીના ચેરમેન અને મેનેજિંગ ડિરેક્ટર મુકેશ અંબાણીના જૂના નિવેદનો સામેલ છે. વીડિયોમાં અંબાણી કહે છે કે, “જામનગરે દુનિયાને બતાવી દીધું છે કે જો આપણે સપના જોઈ શકીએ તો તેને પૂરા પણ કરી શકીએ છીએ.”
મુકેશ અંબાણીનો ચોંકાવનારો વીડિયો
રિલાયન્સ ઈન્ડસ્ટ્રીઝે જામનગર રિફાઈનરીના 25 વર્ષ પૂરા થવા પર સોશિયલ મીડિયા હેન્ડલ X પર એક વીડિયો શેર કર્યો છે. આ વીડિયોમાં જામનગર રિફાઈનરીના નિર્માણની ભવ્યતા અને મહત્વ દર્શાવવામાં આવ્યું છે. બેકગ્રાઉન્ડમાં અંબાણીનો એક જૂનો વીડિયો છે, જેમાં તેઓ કહે છે, “મારા પિતા ધીરુભાઈ અંબાણીનું એક વિઝન છે અને આ વિઝન આપણા બધામાં છે કે આપણે જે પણ કરીએ, તે વર્લ્ડ ક્લાસ હોવું જોઈએ.” આ વીડિયો દ્વારા રિલાયન્સે જામનગર રિફાઈનરીને ચમત્કારિક બાંધકામ ગણાવ્યું છે અને તેને “મેકિંગ ઓફ અ માર્વેલ” ગણાવ્યું છે.
પેટ્રોલ અને ડીઝલની આયાત પરની નિર્ભરતા ઘટી છે
રિલાયન્સ ઇન્ડસ્ટ્રીઝની જામનગર રિફાઇનરી ભારતની કુલ પેટ્રોલિયમ રિફાઇનિંગ ક્ષમતામાં 25 ટકા યોગદાન આપે છે. આ રિફાઇનરીએ ભારતને પરિવહન ઇંધણમાં આત્મનિર્ભર બનાવવામાં મહત્વની ભૂમિકા ભજવી છે અને પેટ્રોલિયમ ઉત્પાદનોની આયાત પર નિર્ભરતા ઘટાડીને વિદેશી હૂંડિયામણ બચાવવામાં યોગદાન આપ્યું છે. આ રિફાઇનરી માત્ર 33 મહિનામાં બનાવવામાં આવી હતી, જે વિશ્વની સૌથી મોટી અને સૌથી આધુનિક રિફાઇનરી પ્રોજેક્ટ્સમાંની એક છે.
એક સ્થાન પર સૌથી મોટું ખાનગી રોકાણ
જામનગર રિફાઇનરી $3.4 બિલિયનના ખર્ચે બનાવવામાં આવી હતી, જે એશિયાના અન્ય રિફાઇનરી પ્રોજેક્ટના ખર્ચ કરતાં 30-40 ટકા ઓછી છે. આ પ્રોજેક્ટ માત્ર રિલાયન્સ દ્વારા જ નહીં પરંતુ કોઈપણ ભારતીય કંપની દ્વારા કરવામાં આવેલું અત્યાર સુધીનું સૌથી મોટું ઉદ્યોગ રોકાણ છે. જામનગરમાં આ સિંગલ-સાઇટ રિફાઇનરી દ્વારા, રિલાયન્સે વિશ્વના ટોચના સ્તરે ભારતના પેટ્રોલિયમ ક્ષેત્રમાં તેની ક્ષમતા સ્થાપિત કરી છે.
