Rahul Gandhi: રાહુલ ગાંધીએ ફરી વાર કહ્યું,અદાણી જેલમાં હોવા જોઈએ, સરકાર તેમને બચાવી રહી છે
Rahul Gandhi લોકસભામાં વિપક્ષના નેતા રાહુલ ગાંધીએ બુધવારે ઉદ્યોગપતિ ગૌતમ અદાણીની ધરપકડની માંગ ફરી ઉઠાવી અને આરોપ લગાવ્યો કે કેન્દ્ર સરકાર તેમને રક્ષણ આપી રહી છે.
સંસદ સંકુલમાં પત્રકારો સાથે વાતચીત કરતી વખતે તેમણે દાવો કર્યો હતો કે અદાણી પર અમેરિકામાં હજારો કરોડ રૂપિયાની ગેરરીતિના કેસમાં આરોપ મૂકવામાં આવ્યો છે, તેથી તેમને જેલમાં જ રહેવું જોઈએ.
અગાઉ અદાણી ગ્રુપની કંપની અદાણી ગ્રીન એનર્જી લિમિટેડે બુધવારે જણાવ્યું હતું કે અબજોપતિ ગૌતમ અદાણી અને તેમના ભત્રીજા સાગર અદાણી પર કથિત લાંચના કેસમાં યુએસ ફોરેન કરપ્ટ પ્રેક્ટિસ એક્ટ (FCPA) ના ઉલ્લંઘનનો આરોપ મૂકવામાં આવ્યો નથી.
કંપની એમ પણ કહે છે કે તેના પર સિક્યોરિટીઝ છેતરપિંડીનો આરોપ મૂકવામાં આવ્યો છે, જેમાં નાણાકીય દંડ લાદવાનો સમાવેશ થાય છે.
જ્યારે આ વિશે પૂછવામાં આવ્યું ત્યારે રાહુલ ગાંધીએ કહ્યું, “શું તમને (મીડિયા પર્સન) લાગે છે કે અદાણી તેમના પરના આરોપો સ્વીકારશે? તમે કઈ દુનિયામાં રહો છો? અલબત્ત તે નકારશે. અમે અગાઉ કહ્યું તેમ, તેમની ધરપકડ થવી જોઈએ.
કોંગ્રેસના પૂર્વ અધ્યક્ષે કહ્યું, “નાના કેસમાં સેંકડો લોકોની ધરપકડ કરવામાં આવે છે. આ સજ્જન પર અમેરિકામાં હજારો કરોડ રૂપિયાની ઉચાપતનો આરોપ મૂકવામાં આવ્યો છે. તે જેલમાં હોવો જોઈએ.” તેમણે આરોપ લગાવ્યો કે સરકાર અદાણીનું રક્ષણ કરી રહી છે.
રાહુલ ગાંધીએ પણ થોડા દિવસો પહેલા અદાણીની ધરપકડની માંગ કરી હતી.
