મહારાષ્ટ્ર વિધાનસભાની ચૂંટણીમાં મહાયુતિ ઐતિહાસિક દેખાવ તરફ આગળ વધી રહ્યું છે. મહાયુતિની સત્તાની રચનાનો માર્ગ સ્પષ્ટ જણાય છે. દેવેન્દ્ર ફડણવીસ ત્રીજી વખત રાજ્યના મુખ્ય પ્રધાન બને તેવી પ્રબળ સંભાવના છે. ભાજપ તરફથી પણ આવી હિલચાલ શરૂ થઈ ગઈ છે.
રાજ્ય ચૂંટણી પંચ આજે મોડી રાતે અથવા તો રવિવારે વિજયી ઉમેદવારોને પ્રમાણપત્ર આપે કે તરત જ ભાજપના વિધાનસભ્યોની બેઠકનું આયોજન કરવામાં આવ્યું છે. આવી જ રીતે મહાયુતિના અન્ય ઘટકપક્ષો પણ પોતાના વિધાનસભ્યોની બેઠકનું આયોજન કરશે અને સોમવારે સરકારના ગઠન માટેનો દાવો રાજ્યપાલ સમક્ષ માંડશે.
આમેય રાજ્ય વિધાનસભાની મુદત મંગળવારે પૂરી થાય છે અને તેના પહેલાં દાવો માંડવામાં ન આવે તો રાષ્ટ્રપતિ શાસન લાદવામાં આવે એવી શક્યતા હોવાથી તે પહેલાં જ દાવો રજૂ કરવો એવું નક્કી કરવામાં આવ્યું હોવાનું કહેવાઈ રહ્યું છે.
સ્પષ્ટ પરિણામોને ધ્યાનમાં રાખીને ભાજપ દ્વારા સરકારના ગઠન માટેની હિલચાલ શરૂ કરી નાખવામાં આવી છે. રવિ રાણા સહિત નાના પક્ષોના નેતાઓ અને અપક્ષ વિધાન સભ્યોને રવિવારે મુંબઈ આવી જવા માટેના સંકેત આપી દેવામાં આવ્યા છે.
ભાજપના વિધાનસભ્યોની બેઠક રવિવારે જ યોજાય તેવી શક્યતા છે. સૂત્રો પાસેથી માહિતી મળી રહી છે કે 25 નવેમ્બરે શપથ લેવાની પ્રક્રિયા શરૂ કરવામાં આવી છે. અંતિમ નિર્ણય દિલ્હીથી આવ્યા બાદ નક્કી કરવામાં આવશે.
હાલમાં દેવેન્દ્ર ફડણવીસનું નામ મુખ્ય પ્રધાનપદની રેસમાં સૌથી આગળ છે. ભાજપના નેતા પ્રવિણ દરેકરે સ્પષ્ટતા કરી છે કે ‘ભાજપ પાસે મહાયુતિમાં વધુ બેઠકો છે.
શરદ પવારનો પાવર જતો રહ્યો છે અને ઉદ્ધવ ઠાકરે ઉંધા માથે પટકાયા છે. મહારાષ્ટ્રની લાડકી બહેનોએ મહાયુતિને ભરીભરીને મત આપ્યા છે. તો ‘બંટેંગે તો કટેંગે’ અને ‘એક હૈ તો સેફ હૈ નારા’ પણ ચાલી ગયા છે. મહાયુતિ 220થી વધુ બેઠકો પર આગળ ચાલી રહી છે, તેથી મહાયુતિની સરકારની રચના લગભગ નિશ્ચિત માનવામાં આવે છે. હાલમાં, ભાજપ એકલી જ 128 બેઠકો પર આગળ છે, તેથી હવે દેવેન્દ્ર ફડણવીસને સીએમ પદ મળે તેવી અટકળો તેજ બની છે.
એવા સમાચાર છે કે સીએમ પદની રેસમાં દેવેન્દ્ર ફડણવીસ સૌથી આગળ છે. ફડણવીસની નજીક મનાતા એમએલસી પ્રસાદ લાડે પણ કહ્યું છે કે દેવેન્દ્ર ફડણવીસને સીએમ બનવું જોઈએ. હાલમાં મહાયુતિ 225 બેઠકો પર અને મહાવિકાસ આઘાડી 58 સીટ પર આગળ છે. મહાયુતિએ બહુમતીનો આંક પાર કરી લીધો છે અને એવું માનવામાં આવે છે કે રાજ્યમાં ભાજપના જ સીએમ હશે અને દેવેન્દ્ર ફડણવીસને જ રાજ્યના સીએમ બનાવવામાં આવશે.
