મોલ અને મલ્ટિપ્લેકસના પાર્કીંગમાં લેવામાં આવતા ચાર્જ અંગે ગુજરાત હાઇકોર્ટે મુલાકાતીઓ માટે ખુશીના સમાચાર આપ્યા છે. હાઇકોર્ટના આદેશ પ્રમાણે હવેથી મોલ અને મલ્ટિપ્લેક્સના સંચાલકો મુલાકાતીઓ પાસેથી પાર્કિંગ ચાર્જના નામે ફી નહીં ઉઘરાવી શકે. નોંધનીય છે કે આ પહેલા સિંગલ જજની બેચે ટુ-વ્હિલર માટે રૂ. 10 અને ફોર વ્હિલર માટે રૂ. 20 પાર્કિંગ ચાર્જ ઉઘરાવવાની છૂટ આપી હતી. હાઇકોર્ટના પ્રથમ આદેશ પહેલા સરકાર અને પોલીસ તરફથી શહેરના તમામ મોલ અને મલ્ટિપ્લેક્સને પાર્કિંગ ચાર્જ નહીં વસૂલવાનો આદેશ કરવામાં આવ્યો હતો. આ મામલે મોલ અને મલ્ટિપ્લેક્સના સંચાલકો હાઇકોર્ટમાં ગયા હતા.
મંગળવારે આ કેસની સુનાવણી દરમિયાન કોર્ટે અરજીદાર સંચાલકોને ખંખેરી લીધા હતા. તેની સાથે એવું પણ કહ્યું હતું કે જો મોલમાં પૂરતી પાર્કિંગની સુવિધા નહીં હોય તો પણ પગલાં લેવાશે. આ કેસની વધુ સુનાવણી 30મી નવેમ્બરના રોજ હાથ ધરાશે.
સુનાવણી દરમિયાન હાઇકોર્ટે અરજદારોને સવાલ કર્યો હતો કે તમે કયા આધારે ચાર્જ વસૂલ કરો છો? જવાબમાં સંચાલકોએ સિંગલ જજના આદેશનું બહાનું આગળ ધરતા બે જજની ખંડપીઠે કહ્યું હતું કે, “જરૂરી નથી કે અમે એ આદેશ સાથે સહમત હોઈએ. આજે તમે પાર્કિંગ ચાર્જ વસૂલ કરો છો, કાલે ઉઠીને તમે બાળકો કે વડીલોના મોલમાં પ્રવેશવા પર પણ પ્રવેશ ફી શરૂ કરશો. આ પ્રકારની મનમાની ચલાવી ન લેવાય.”