આજે ભાઈબીજના દિવસે મોદી સરકારે દેશની તમામ બહેનોની રસોઈને મોંઘી કરી દીધી છે. ગેસ સિલિન્ડરના ભાવમાં વધારો કરવામાં આવ્યો છે. નવેમ્બર મહિનામાં સરકારે બીજી વખત LPG ગેસ સિલિન્ડરના ભાવમાં વધારો કર્યો છે. મોદી સરકારે LPG ડીલર્સના કમીશનમાં વધારો કરવાથી ઘરેલુ કુકિંગ ગેસ LPGની કિંમતમાં 2 રૂપિયા પ્રતિ સિલિન્ડર વધારો કરવામાં આવ્યો છે. નવા ભાવ વધારા સાથે 14.2 કિગ્રા સબસિડીવાળા સિલિન્ડરની કિંમત 507.42 રૂપિયા થઈ ગઈ છે, જ્યારે અત્યાર સુધી તેની કિંમત 505.34 હતી.
પેટ્રોલિયમ મંત્રાલયે ડીલર કમીશન વધારવાનો આદેશ આપ્યો હતો. મંત્રાલયે પોતાના આદેશમાં કહ્યું હતું કે, 14.2 કિલો અને 5 કિલોના સિલિન્ડર પર ઘરેલુ LPG ડિસ્ટ્રીબ્યૂટર્સનું કમિશન ગત વર્ષે સપ્ટેમ્બરમાં ક્રમશ 48.89 રૂપિયા તથા 24.20 રૂપિયા કરવામાં આવ્યું હતું.
આદેશ અનુસાર, LPG વિતરકોના કમીશનની નવી રીતે સમિક્ષા કરવા માટેના અભ્યાસમાં વિલંબ થયા વચ્ચે પરિવહન ખર્ચ, પગાર વગેરેમાં વૃદ્ધિને જોઈ અંતરિમ ઉપાયના રૂપે વિતરકોનું કમિશન 14.2 કિલો સિલિન્ડર માટે વધીને 50.58 રૂપિયા પ્રતિ સિલિન્ડર તથા 5 કિલોના સિલિન્ડરના મામલામાં 25.29 રૂપિયા કરવાનો નિર્ણય લીધો છે.
પહેલી નવેમ્બરે કિંમત 2.94 રૂપિયા પ્રતિ સિલિન્ડર વધારવામાં આવી હતી. જૂન બાદથી બેસ પ્રાઈઝ પર ચુકવવામાં આવતી જીએસટીના કારણે દર મહિને કિેંમતો વધી રહી છે અને અત્યાર સુધીમાં કુલ 16.21 રૂપિયાનો વધારો થઈ ચુક્યો છે.