વિધાનસભા ચૂંટણીના પરિણામો બાદ શેરબજારમાં જબરદસ્ત ઉછાળો જોવા મળ્યો હતો. સોમવારે બપોરે 2.30 વાગ્યા સુધીના ટ્રેડિંગમાં સેન્સેક્સ 1,248.89 (1.85%) પોઈન્ટના વધારા સાથે 68,745.67ના રેકોર્ડ સ્તરે પહોંચી ગયો છે. બીજી તરફ, નિફ્ટીએ પણ 386.70 (1.91%) પોઈન્ટનો ઉછાળો નોંધાવ્યો છે અને પ્રથમ વખત 20,654.60ને પાર કર્યો છે. તેલ અને ગેસ સેક્ટરના શેરમાં સૌથી વધુ વૃદ્ધિ જોવા મળી રહી છે.
આ પહેલા સોમવારે બજારો રેકોર્ડ હાઈ પર ખુલ્યા હતા. શરૂઆતના કારોબારમાં, BSE સેન્સેક્સ 1,024.29 (1.51%) ના મજબૂત વધારા સાથે 68,504.43 ના સ્તરે ટ્રેડ થઈ રહ્યો હતો. બીજી તરફ, NSE નિફ્ટી 304.40 (1.50%) પોઈન્ટ ઉછળીને 20,572.30 ના સ્તરે પહોંચ્યો હતો. આ સમયગાળા દરમિયાન બેન્ક નિફ્ટીએ પણ મજબૂતી દર્શાવી હતી અને તે 811 પોઇન્ટ વધીને 45,625 પર ટ્રેડ થતો જોવા મળ્યો હતો.
ચૂંટણી પરિણામોમાં ભાજપની જીત બાદ રોકાણકારો ઉત્સાહિત જોવા મળ્યા હતા.
મજબૂત સ્થાનિક અને વૈશ્વિક સંકેતોને કારણે બજાર ઉછળ્યું હતું. વિધાનસભા ચૂંટણીમાં ભાજપની જીત બાદ રોકાણકારો પણ ઉત્સાહિત જોવા મળ્યા હતા. નિફ્ટીમાં અદાણી એન્ટરપ્રાઈઝ અને અદાણી પોર્ટ્સના શેર 4-7% વધ્યા હતા. આ પહેલા શુક્રવારે BSE સેન્સેક્સ 492 પોઈન્ટ ચઢીને 67481 પર બંધ થયો હતો.
BSE લિસ્ટેડ કંપનીઓના માર્કેટ કેપમાં રૂ. 4.09 લાખ કરોડનો વધારો થયો છે
સોમવારે શરૂઆતના ટ્રેડિંગ દરમિયાન સેન્સેક્સ લિસ્ટેડ કંપનીઓનું માર્કેટ કેપ રૂ. 4.09 લાખ કરોડ વધીને રૂ. 341.76 લાખ કરોડે પહોંચ્યું હતું. સેન્સેક્સમાં SBI, ICICI, L&T, NTPC અને એરટેલના શેર બે ટકાના વધારા સાથે ટોપ ગેઇનર તરીકે ટ્રેડ થતા જોવા મળ્યા હતા. આ સિવાય એમએન્ડએમ, એચડીએફસી બેંક, બજાજ ફાઇનાન્સ અને એક્સિસ બેંકના શેર પણ ઉછાળા સાથે ખુલ્યા હતા. માત્ર નેસ્લેનો સ્ટોક જ લાલ નિશાનમાં ખૂલ્યો હતો.
અદાણી ગ્રુપના શેરમાં પણ વધારો થયો હતો
આ સમયગાળા દરમિયાન અદાણી ગ્રુપના શેરમાં પણ 14%નો વધારો થયો હતો. અદાણી એનર્જી સોલ્યુશન્સનો શેર 14 ટકા વધ્યો હતો જ્યારે અદાણી પાવર અને અદાણી ગ્રીન એનર્જીનો શેર 12 ટકા વધ્યો હતો. અદાણી એન્ટરપ્રાઈઝ, અદાણી ટોટલ ગેસ અને અદાણી વિલ્મરના શેરમાં 6-8% સુધીનો વધારો જોવા મળ્યો હતો.
