વિમેન્સ ડે પર પીએમે કહ્યું કઈ મહિલાએ આપી હતી તેમને પ્રેરણા

નવી દિલ્હી: વિમેન્સ ડે પર પીએમ મોદીએ ટ્વીટર પર જણાવ્યું હતું કે, 106 વર્ષના એક મહિલાના એક કાર્યમાંથી તેમને પ્રેરણા મળી હતી. પીએમે લોકોને પણ અપીલ કરી હતી કે તેઓ પોતાને પ્રેરણા આપનારી મહિલાઓ વિશે કંઈક લખે. પીએમે આજના દિવસે 106 વર્ષના જે મહિલાની વાત કરી છે તેમનું નામ કુંવર બાઈ હતું, જેમણે ઘરમાં ટોઈલેટ બનાવવા પોતાની બકરીઓ વેચી દીધી હતી.
પીએમે લખ્યું હતું કે, સ્વચ્છ ભારત અભિયાનમાં કુંવર બાઈનું પ્રદાન ક્યારેય ભૂલી નહીં શકાય. હું તેમના આ ઉમદા કાર્યથી ખૂબ પ્રેરિત થયો છું. ઉલ્લેખનીય છે કે, પીએમે એક કાર્યક્રમમાં સ્વ. કુંવર બાઈના ચરણ પણ સ્પર્શ કર્યા હતા.
તાજેતરમાં જ કુંવર બાઈ અવસાન પામ્યા હતા. પોતાના ગામમાં ટોઈલેટ બનાવનારા તેઓ પહેલા વ્યક્તિ હતા, જેમણે ટોઈલેટ બનાવવા 22,000 રુપિયા એકઠા કરવા જીવાદોરી સમાન બકરીઓ વેચી દીધી હતી. પીએમે કહ્યું હતું કે, છત્તીસગઢમાં એક કાર્યક્રમમાં મને તેમના આશિર્વાદ લેવાનો મોકો મળ્યો હતો, તે સમયને હું હંમેશા યાદ રાખીશ.
પીએમે લખ્યું છે કે, કુંવર બાઈનું આ વર્ષે જ અવસાન થયું, પરંતુ ગાંધી બાપુના સ્વપ્ન એવા સ્વચ્છ ભારતના મિશનને પૂરું કરવા જેઓ તત્પર છે તેમના મનમાં કુંવર બાઈ હંમેશા જીવીત રહેશે. પીએમ મોદી આજે રાજસ્થાનના જુનજુનુની મુલાકાત લેવાના છે, જ્યાંથી તેઓ નેશનલ ન્યુટ્રિશિયન મિશનની શરુઆત કરાવશે, આ મિશનનો હેતુ જન્મ સમયે ઓછા વજન તેમજ કુપોષણ સાથે જન્મતા બાળકોનું પ્રમાણ ઓછું કરવાનો તેમજ મહિલાઓ અને બાળકો ખાસ તો છોકરીઓમાં એમોનિયાનું પ્રાણ ઘટાડવાનો છે.