ગુજરાતમાં ભાજપના કાર્યકર્તાઓને સંબોધતા ભાજપના અધ્યક્ષ જેપી નડ્ડાએ કહ્યું કે કોંગ્રેસ હવે રાષ્ટ્રીય પાર્ટી નથી પરંતુ ભાઈ-બહેનોની પાર્ટી છે.
ગુજરાતમાં વિધાનસભાની ચૂંટણીને લઈને પાર્ટીના ચૂંટણી પ્રચારમાં જોડાવા આવેલા જેપી નડ્ડાએ જણાવ્યું હતું કે દેશમાં ભાજપ એકમાત્ર એવો પક્ષ બચ્યો છે જેને રાષ્ટ્રીય પક્ષ કહી શકાય. કાર્યક્રમમાં બોલતા જેપી નડ્ડાએ લગભગ તમામ રાજકીય પક્ષોનો ઉલ્લેખ કર્યો હતો. સૌથી પહેલા તેમણે કોંગ્રેસ પાર્ટીથી શરૂઆત કરી હતી. 
કોંગ્રેસ પર કટાક્ષ કરતા જેપી નડ્ડાએ કહ્યું- કોંગ્રેસ હવે રાષ્ટ્રીય પાર્ટી નથી રહી. આજે કોંગ્રેસ માત્ર બે રાજ્યોમાં જ સિમિત થઈ ગઈ છે. અહીં પણ પરિવર્તન આવશે. ભારતીય રાષ્ટ્રીય કોંગ્રેસ હવે ભારતીય કે રાષ્ટ્રીય નથી, તે માત્ર ભાઈ-બહેનની પાર્ટી બની ગઈ છે. આજે કોંગ્રેસની શું હાલત છે તે તમે જ જુઓ.
આ પછી જેપી નડ્ડાએ અન્ય રાજકીય પક્ષોનું નામ લીધું. તેમણે કહ્યું કે પ્રાદેશિક પક્ષોના ઘણા ઉદાહરણો છે જે હવે પારિવારિક પક્ષો બની ગયા છે. તેમણે કહ્યું- જમ્મુ-કાશ્મીરની નેશનલ કોન્ફરન્સ કે PDP ને જુઓ, પંજાબમાં શિરોમણી અકાલી દળને જુઓ, યુપીમાં સમાજવાદી પાર્ટીને જુઓ, ઝારખંડમાં ઝારખંડ મુક્તિ મોરચા જુઓ, પશ્ચિમ બંગાળમાં TMC જુઓ. આ બધા પારિવારિક પક્ષો બની ગયા છે.
નડ્ડાએ આગળ કહ્યું- તમને આંધ્ર પ્રદેશ અને તેલંગાણામાં પણ આવી જ સ્થિતિ જોવા મળશે. તમિલનાડુમાં DMK એક પારિવારિક પાર્ટી બની ગઈ છે. શિવસેના અને NCP હવે મહારાષ્ટ્રમાં પ્રાદેશિક પક્ષ નથી, પરંતુ એક પારિવારિક પક્ષ છે. જેપી નડ્ડા, જેઓ એક દિવસના ગુજરાત પ્રવાસ પર છે, તેમણે ગાંધીનગર, વડોદરા અને અમદાવાદમાં ભાજપના કાર્યકરોને સંબોધિત કર્યા. ગુજરાતમાં આ વર્ષે ડિસેમ્બર સુધીમાં વિધાનસભાની ચૂંટણી યોજાઈ શકે છે.
