જાકાર્તા : ઇન્ડોનેશિયામાં સેમેરૂ નામનો સક્રિય જ્વાળામુખી પ્રચંડ વિસ્ફોટ સાથે ભભૂકી ઉઠ્યો હતો. આ દરમિયાન 13 લોકોના મોત નિપજ્યા હતા. તે ઉપરાંત આ ઘટનામાં એક ડઝન લોકોને ઇજા પણ થઇ હતી. આ દરમિયાન તાત્કાલિક શરૂ કરવામાં આવેલા બચાવ કાર્યમાં જવાનોએ આ દુર્ઘટનામાં ફસાઇ ગયેલા 10 લોકોને બચાવી લઇ તેઓને સલામત સ્થળે ખસેડી લીધા હતા.
ઇન્ડોનેશિયાનો સૌથી ઉંચો ગણાતો સેમેરૂ જ્વાળામુખી જાવાની પૂર્વ દિશામાં આવેલા એક રાજ્યમાં આવેલા છે. જે શનિવારે પ્રચંડ વિસ્ફોટ સાથે ભભૂકી ઉઠયો હતો જેના પગલે તેમાંથી વિકરાળ આગની જ્વાળાઓ લપકા મારતી જોવા મળી હતી.
તે સાથે કાળા ડિબાંગ ધૂમાડા અને રાખના ગોટેગોટા ઉઠતાં આસપાસના ગામડાઓ ઉપર કાળા વાદળો ઘેરાઇ ગયા હતા. આ ઘટનાના પગલે જ્વાળામુખીની નજીકના વિસ્તારોમાં આવેલા ગામડાઓમાં ભયનું મોજુ ફરી વળ્યું હતું અને લોકોએ નાસભાગ મચાવી દીધી હતી.
મૃત્યું પામેલા13 લોકો પૈકી અત્યાર સુધી ફક્ત બે લોકોની જ ઓળખ કરી શકાઇ છે. આ કુદરતી હોનારતમાં નાની મોટી ઇજા પામનારા લોકોનો સંખ્યા અત્યાર સુધી 98 ઉપર પહોંચી ગયો છે. રાહત અને બચાવ ટુકડીએ અસરગ્રસ્ત વિસ્તારના 902 લોકોનું સલામત સ્થળે સ્થળાંતર કરાવ્યું છે.
