સામી દિવાળીએ ડ્રાયફ્રૂટના ભાવ ઘટશે?

અફઘાનિસ્તાન સાથે વેપાર શરૂ થતાં વેપારીઓને રાહત મળી.

દિવાળીનો તહેવાર નજીક આવતાની સાથે ડ્રાયફ્રૂટની માંગ પણ વધી રહી છે. અફઘાનિસ્તાનની સ્થિતિને કારણે તહેવારોની સીઝનમાં ડ્રાય ફ્રુટ્સના ભાવમાં વધારો થયો હતો અને ભાવ વધુ રહેવાનો અનુમાન લગાવવામાં આવ્યો હતો. હવે અફઘાનિસ્તાન સાથે વેપાર ફરી શરૂ થયો છે, ડ્રાયફ્રૂટ સાથે જોડાયેલા વેપારીઓને ઘણી રાહત મળી છે અને એના ભાવ સ્થિર થયા છે. ઓગસ્ટમાં અફઘાનિસ્તાનમાં સરકારમાં ફેરફાર અને ભારત સાથેના વેપાર પર મોટી અસર જોવા મળી હતી.તાલિબાનની સરકાર આવતા અન્ય દેશો સાથેના વ્યાપારિક સબંધો કેવા રહેશે એના પર સૌની નજર રહેલી હતી.

ભાવ સ્થિર રહેશે અને માલની ઉપલબ્ધતા રહેશે

અંજીર મુખ્યત્વે અફઘાનિસ્તાનથી આયાત કરવામાં આવે છે. અફઘાનિસ્તાનના અંજીર સમગ્ર વિશ્વમાં પ્રખ્યાત છે. ઓગસ્ટ દરમિયાન ત્યાં પ્રવર્તમાન પરિસ્થિતિઓને કારણે માલ પહોંચી શક્યો ન હતો. અમદાવાદના ડ્રાય ફ્રૂટના જથ્થાબંધ વેપારી ધર્મેશ પરિયાણીએ જણાવ્યું હતું કે અફઘાનિસ્તાનથી શિપમેન્ટ ફરી શરૂ થવું એ સારા સંકેત છે. ભાવ સ્થિર રહેશે અને તહેવારોની સીઝનમાં માલ ઉપલબ્ધ થશે. આ કારણે અંજીરનો જથ્થાબંધ ભાવ 1800-2000 સુધી પહોંચી ગયો. જો કે, હવે અફઘાનિસ્તાનથી ભારત સહિત વિવિધ દેશોમાં વેપાર ફરી શરૂ થયો છે, અંજીરના ભાવ ફરી સ્થિર થયા છે. હાલમાં અંજીરનો બજાર ભાવ 1200-1500 રૂપિયા પ્રતિ કિલો છે.

બેન્કિંગ સિસ્ટમમાં ભારે અનિશ્ચિતતા

ડ્રાયફ્રૂટ અને સ્પાઇસમાં વેપાર સાથે સંકળાયેલા હિરેન ગાંધી કહે છે કે અંજીરની સાથે અફઘાનિસ્તાનમાંથી બદામ અને કાળી દ્રાક્ષની પણ માંગ છે. અત્તર બોર્ડર મારફતે અફઘાનિસ્તાનથી માલ હાલમાં દિલ્હી આવી રહ્યો છે. જો કે, અફઘાન બેન્કિંગ સિસ્ટમમાં ઘણી અનિશ્ચિતતા છે, જેના કારણે દુબઇ બેન્કો દ્વારા લેવડ-દેવડ કરવામાં આવી રહી છે.