મુંબઇઃ જો તમે નવી કાર ખરીદવાનું વિચારી રહ્યા હોવ તો 31 માર્ચ પહેલા ખરીદી લો કારણ કે 1લી એપ્રિલથી કારના ભાવ વધી જશે. કારની કિંમતો વધવાનું કારણ છે સરકારનો નવો નિયમ. સરકારના નવા નિયમ મુજબ હવે કારમાં ડ્રાઇવર સીટની સાથે-સાથે તેની બાજુના પેસેન્જર સીટ માટે પણ એરબેગ ફરજિયાત કરવામાં આવી છે. એટલે કે હવે ડ્રાઇવરની સાથો સાથ સહ-પેસેન્જરને પણ એરબેગ આપવી ફરજિયાત રહેશે. આ નિયમ 1 એપ્રિલ 2021 થી લાગુ કરવામાં આવશે. માર્ગ અને પરિવહન મંત્રાલયે આ અંગે કાયદા મંત્રાલયને એક પ્રસ્તાવ મોકલ્યો છે જેને મંજૂરી આપવામાં આવી છે.
હવે ફક્ત કારના ડ્રાઇવરો માટે જ નહીં પણ તેની સાથે બેઠેલા મુસાફરો માટે પણ જરૂરી બનશે. કાયદા મંત્રાલયે માર્ગ અને પરિવહન મંત્રાલયની દરખાસ્ત સ્વીકારી લીધી છે, આ માટે આગામી ત્રણ દિવસોમાં જાહેરનામું બહાર પાડવામાં આવશે. આનો અર્થ એ છે કે 1 એપ્રિલ 2021ના રોજ અથવા તેના પછી બનેલી કારોને બે ફ્રન્ટ એરબેગની જરૂર પડશે.
હાલની કારના મોડેલો માટેના નવા નિયમો 31 ઓગસ્ટ, 2021થી અમલમાં આવશે, જેની સૂચિત સમયમર્યાદા જૂન 2021 હતી, જે હવે વધારી દેવામાં આવી છે. ગયા વર્ષે ડિસેમ્બરમાં સરકારે તમામ કારમાં આગળના મુસાફરો માટે એરબેગ ફરજિયાત બનાવવા માટે લોકો પાસેથી પ્રતિક્રિયા અને સૂચનો માંગ્યા હતા. જો કે આનાથી ઓટો કંપનીઓની કિંમતમાં પણ વધારો થશે.
પરિવહન મંત્રાલયે જારી કરેલી સૂચના મુજબ, એરબેગ્સ એઆઈએસ 145 બ્યુરો ઓફ ઇન્ડિયન સ્ટાન્ડર્ડ્સ એક્ટ, 2016 હેઠળ બનાવવામાં આવશે. હાલમાં તમામ કારમાં ડ્રાઇવરની સીટ માટે એરબેગ ફરજિયાત છે, પરંતુ સાથે બેઠેલા મુસાફરો માટે ચોક્કસપણે કોઈ એરબેગ નથી, જેના કારણે અકસ્માત દરમિયાન ગંભીર ઈજા અને મોતનો ભય રહે છે. તમને જણાવી દઇએ કે મોટાભાગની કારમાં સ્પીડ એલર્ટ્સ, રિવર્સ પાર્કિંગ સેન્સર અને સીટ બેલ્ટ રિમાઇન્ડર્સ જેવી સ્ટાન્ડર્ડ સુવિધાઓ ફરજિયાત છે, પરંતુ લાઇફ સેવિંગ એરબેગ્સ ફરજિયાત નથી.
