મોદી અયોધ્યામાં રામમંદિરનું નિર્માણ કરાવી રહ્યા છે, હવે ઈમરાને પણ જવાબ આપવા ઈસ્લામાબાદમાં ભવ્ય કૃષ્ણ મંદિરનું નિર્માણ કરાવવું જોઈએ: પાકિસ્તાન પીપલ્સ પાર્ટી

પ્રધાનમંત્રી નરેન્દ્ર મોદીએ બુધવારે અયોધ્યામાં રામમંદિરનું ભૂમિપૂજન કર્યું છે. આ સાથે જ રામલલાના ભવ્ય મંદિરના નિર્માણની કામગીરી શરૂ થઈ જશે. પાકિસ્તાન પણ આ બાબતને લઈ સ્તબ્ધ થઈ ગયુ છે. અહીં પાકિસ્તાન પીપલ્સ પાર્ટી (PPP)એ ઈમરાન સરકાર સમક્ષ મોદીને જવાબ આપવાની માંગ રજૂ કરી છે. આ માંગ પણ એવી છે કે જેના મારફતે પાકિસ્તાનમાં પરિવર્તન થઈ શકે છે. PPP એ કહ્યું છે કે મોદી અયોધ્યામાં રામમંદિરનું નિર્માણ કરાવી રહ્યા છે. હવે ઈમરાને પણ જવાબ આપવા ઈસ્લામાબાદમાં ભવ્ય કૃષ્ણ મંદિરનું નિર્માણ કરાવવું જોઈએ. અત્રે ઉલ્લેખનીય છે કે ઈસ્લામાબાદમાં એક મહિના અગાઉ કૃષ્ણમંદિરનું કાર્ય શરૂ થયુ હતું. પણ કટ્ટરવાદીઓના દબાણમાં આવી સરકારે આ કાર્ય અટકાવી દીધુ હતું. ઈસ્લામાબાદમાં મંદિરનું નિર્માણ કરી આપણે વિશ્વને એ બાબત દર્શાવી શકશુ કે પાકિસ્તાનમાં તમામ ધર્મનું સન્માન કરવામાં આવે છે. ઈસ્લામાબાદમાં મંદિર નિર્માણની કામગીરી અટકાવવા માટે ત્રણ અરજી દાખલ કરવામાં આવી છે. આ ત્રણેય અરજીને હાઈકોર્ટે નકારી દીધી છે- હાઈકોર્ટનું કહેવુ છે કે મંદિર નિર્માણ માટે સંબંધિત એજન્સીઓની મંજૂરી મેળવવામાં આવે. ખાસ વાત એ છે કે મંદિર નિર્માણ માટે 2017 માં જમીનની ફાળવણી કરવામાં આવી હતી. ત્યાર પછીના વર્ષ એટલે કે વર્ષ 2018માં તે હિન્દુ પંચાયતને સોંપી દેવામાં આવી હતી. જોકે, તેમ છતાં મંદિર નિર્માણની શરૂઆત થઈ શકી ન હતી. સરકાર કટ્ટરવાદીઓના દબાણ હેઠળ છે.