રાજકોટમાં સતત બીજા દિવસે મેઘાનું દે ધનાધન: વીજળી પડતાં યુવતીનું મોત.

રાજકોટ: ગઈકાલે રાજકોટમાં ધોધમાર 3 ઈંચ વરસાદ વરસ્યો હતો અને આજે બીજા દિવસે પણ તોફાની વરસાદની શરૂઆત થઈ હતી. શહેરમાં પવનના સુસવાટા સાથે વરસાદ વરસવાનું શરૂ થયો હતો. ગઈકાલે વરસેલા વરસાદે તંત્રની પ્રિ-મોન્સૂન કામગીરીની પોલ ખોલી હતી. તેમજ વિજતંત્રના દાવા પણ પોકળ સાબિત થયા હતા. તેમજ માર્કેટિંગ યાર્ડમાં પણ લાખોની મગફળી પલળી ગઈ હતી. ત્યારે આજે ફરીથી સાંજે ધોધમાર વરસાદ વરસતા તંત્ર ઊંધમાથે થયું છે. જો કે રંગીલા રાજકોટવાસીઓએ રસ્તા પર ઉતરી આવીને વરસાદની મોજ માણી હતી. રાજકોટ ઉપરાંત જેતપુર શહેર અને આસપાસના વિસ્તારો તેમજ ગોંડલ, ધોરાજી સહિતના સ્થળોએ પણ આજે વરસાદે વરસવાનું શરૂ કર્યું હતું. વીજળીના કડાકાભડાકા વચ્ચે વરસાદે આગમન કર્યું હતું. વરસાદને પગલે વાતાવરણ ખુશનુમા બન્યું હતું. અને ધારણા કરતાં વહેલા વરસાદથી ખેડૂતોમાં ઉત્સાહ જોવા મળ્યો હતો. જોકે આ ઉત્સાહમાં બે દુઃખદ ઘટના પણ બની હતી. જોધપુરમાં વરસાદમાં ન્હાવા નીકળેલી 22 વર્ષિય હિરલ સખરેલિયા નામની યુવતી પર વીજળી પડતાં તેનું મોત નીપજ્યું હતું જ્યારે રાજકોટમાં મવડી ખાતે વીજળી પડતાં 22 વર્ષિય વિશાલ કપુરિયા નામનો યુવક ઈજાગ્રસ્ત થયો હતો. તેને સારવાર માટે તુરંત હોસ્પિટલમાં ખસેડાયો હતો