સોલાનો ખતરનાક ખેલ – કોરોનાના સંભવિત લક્ષણના દર્દીને ભગાડી દીધો…

ગાંધીનગર – અમદાવાદ સ્થિત સોલા સિવિલ હોસ્પિટલ ખતરનાક ખેલ ખેલી રહી છે. ઉપરથી સૂચના હોય કે વ્યક્તિગત રીતે કોઇએ આમ કર્યું હોય પરંતુ તે સાચી દિશાનો રસ્તો નથી. આ હોસ્પિટલના સ્ટાફે કોરોના વાયરસના સંભવિત લક્ષણોયુક્ત દર્દીને ભગાડી દીધો છે. તેનો ટેસ્ટ કરવાનો ઇન્કાર કરી દેવામાં આવ્યો છે.

અમદાવાદ સ્થિત કોબા સિવિલ હોસ્પિટલમાં કોરોના વાયરસના લક્ષણો સાથે ગયેલા અમદાવાદના એક યુવકે કહ્યું હતું કે મારે કોરોનાનો ટેસ્ટ કરાવવો છે. તેને પૂછવામાં આવ્યું કે શું થાય છે ત્યારે તે યુવાન કહે છે કે મને ગળામાં દુખાવો છે અને તાવ છે. સિવિલના સ્ટાફે આ યુવકને કહ્યું કે તમે જે દવા લો છો તે લઇને ઘરે ક્વોરન્ટાઇન થઇ જાવ. ટેસ્ટ કરવાની જરૂર નથી. અમદાવાદમાં રહેતા રોહન કુમાવતને સોલા સિવિલનો કડવો અનુભવ થયો છે.

તેણે તેની ફેસબુક પોસ્ટમાં લખ્યું છે કે—

મારૂં નામ રોહન કુમાવત છે. હું આજે સોલા સિવિલ હોસ્પિટલમાં મારો કોરોના રિપોર્ટ કરાવવા માટે ગયો હતો. મને છેલ્લા પાંચ દિવસથી તાવ છે. ગળામાં ખૂબ દુખાવો છે. શ્વાસ લેવામાં પણ તકલીફ પડે છે. મેં કેટલીક દવાઓ લીધી હતી પરંતુ તેનાથી સારૂં થતું નથી. મારી તબિયત એવી જ હોવાથી હું સોલા સિવિલમાં કોરોના ટેસ્ટ માટે ગયો હતો.

મને કોરોના છે કે નહીં તેનું મારે ચેકીંગ કરાવવું હતું પરંતુ હોસ્પિટલમાંથી મને કહેવામાં આવ્યું કે તમારો ટેસ્ટ નહીં થાય. મને એમ પણ કહેવામાં આવ્યું કે તમે જે દવા લો છો તે બીજા પાંચ દિવસ સુધી ચાલુ રાખો.

મને કોરોના જેવા જ લક્ષણો છે છતાં મારો કોરોના ટેસ્ટ થતો નથી તેથી મને આશ્ચર્ય થાય છે. મારી અને મારા પરિવારની જીંદગી દાવ પર લાગેલી છે. મને જો કોરોના હશે તો મારા પરિવારના સભ્યોને થશે પરંતુ મારો ટેસ્ટ કરવાનો ઇન્કાર કરવામાં આવે છે તેનું કારણ મને સમજાતું નથી.

મને બહું દુખ થાય છે કે સરકારની આવી સર્વિસ કેમ છે…

રોહને તેના ફોટા સાથે ગઇકાલે આ પોસ્ટ તેના ફેસબુક એકાઉન્ટ પર મૂકી છે. તે ફેડોરા સોલ્યુશન કંપનીના એડમિનમાં સિનિયર એક્ઝિક્યુટીવ તરીકે નોકરી કરે છે. ફેસબુકની કોમેન્ટમાં તેને ઘણાં મિત્રોએ 104 નંબરમાં કોલ કરવા સહિતની ભલામણો કરી છે. કોઇએ તેને પ્રાઇવેટ લેબમાં જવાનું કહ્યું છે.