તાપી જિલ્લામાં સખીમંડળની બહેનો માસ્ક બનાવી કેટલા રૂપિયા કમાઇ છે જાણો…

ગાંધીનગર – ગુજરાતમાં કોરોના સંક્રમણ અને લોકડાઉનના સમયમાં સખીમંડળની બહેનોએ કમાણી કરી છે. જરૂરતમંદોને માસ્ક બનાવી આપ્યાં છે અને તેના મહેનતાણા પેટે રોજગારી મેળવી છે. એકલા તાપી જિલ્લાના ગ્રામીણ મહિલા સખી મંડળોની આવક જાણીને આશ્ચર્ય થશે.

જિલ્લા ગ્રામ વિકાસ એજન્સીના નિયામક જેજે નિનામા તરફથી મળેલ વિગતો અનુસાર તાપી જિલ્લામા ‘મિશન મંગલમ યોજના’ અંતર્ગત કાર્યરત સખી મંડળો પૈકી 43 સખી મંડળો દ્રારા માસ્ક બનાવવાની કામગીરી હાથ ધરવામાં આવી છે. આ મહિલાઓ દ્વારા કુલ 181000 માસ્ક તૈયાર કરી, આ માસ્કના વેચાણ થકી કુલ 1938720 રૂપિયાની આવક મેળવવામાં આવી છે.

જિલ્લાની કુલ 66 ગ્રામ પંચાયતોમાં આ માસ્કનુ વિતરણ કરી, મનરેગા યોજનાના 8000 જેટલા શ્રમીકોને સખી મંડળો દ્રારા બનાવેલ આ માસ્કનુ વિતરણ કરવામા આવ્યુ છે. આ મહિલાઓને હજી વધુ માસ્ક બનાવવાના ઓર્ડર મળ્યાં છે. જિલ્લા ગ્રામ વિકાસ એજન્સી કહે છે કે લોકડાઉનના સમયમાં માસ્ક બનાવીને ગ્રામીણ મહિલાઓએ લોકોને મદદરૂપ થવાનું કામ કર્યું છે અને સાથે સાથે માસ્ક બનાવીને રોજીરોટી પણ મેળવી છે.