રૂપાણીએ શિવાનંદ ઝા ને કઇ સૂચના આપ્યાં પછી પોલીસ હરકતમાં આવી, જાણો…

ગાંધીનગર – ગુજરાતના 33 જિલ્લા પૈકી 20 જિલ્લામાં પ્રવેશી ચૂકેલો કોરોના વાયરસ વધુને વધુ ગામડામાં ન ફેલાય તે માટે રાજ્ય પોલીસે સ્ટેટેજી બનાવી છે. આ સ્ટેટેજીમાં જે ગામડામાં એકલ-દોકલ કેસ નોંઘાયા છે ત્યાં વધારે સાવચેતી રાખીને અન્ય ગામડાઓથી તે ગામનો સંપર્ક તોડી નાંખવામાં આવ્યો છે.

ગ્રામ્ય વિસ્તારમાં જે ગામડાઓમાં કોરોના પોઝિટીવના દર્દીઓ મળ્યાં છે ત્યાં ગામના સરપંચ અને જિલ્લા વહીવટી તંત્રને સતર્ક કરી પોલીસનો બંદોબસ્ત ગોઠવી દેવામાં આવ્યો છે. કેટલાક સરપંચોએ તેમના ગામડાઓ લોક કરી દીધા છે. એક ગામમાંથી બીજા ગામમાં જતાં લોકોની અવર-જવર પર પ્રતિબંધ લાગુ કરી દેવામાં આવ્યો છે.

રાજ્યના પોલીસ વડા શિવાનંદ ઝા એ કહ્યું હતું કે ગુજરાતના શહેરોમાં જોવા મળતો કોરોના વાયરસ ગ્રામ્ય વિસ્તારમાં ફેલાય નહીં તે માટે રાજ્યની જિલ્લા પોલીસને સતર્ક કરી દેવામાં આવી છે. ગામડાઓમાં પણ સજ્જડ લોકડાઉન શરૂ કરવામાં આવ્યું છે. જે લોકોને જીવન જરૂરીયાતની ચીજવસ્તુઓ ખરીદવી છે તેમને ટોળાબંધી ન કરવા અથવા તો હોમ ડિલીવરીથી પહોંચાડવાનો નિર્ણય કરવામાં આવ્યો છે.

રાજ્ય પોલીસે ગ્રામ્ય વિસ્તારોમાં પણ વધુ ફોકસ કરીને બેરિકેટીંગ કરવા સાથે ચેકપોસ્ટની સંખ્યા પણ વધારવાનો નિર્ણય કરવામાં આવ્યો છે. શહેરી વિસ્તારમાં જે લોકો ગામડાઓમાં રહેવા ગયા છે તેમને હમણાં ત્યાં જ રહેવાના આદેશ આપવામાં આવ્યા છે, જ્યારે શહેરી વિસ્તારમાં કોઇ પરિવાર કે વ્યક્તિને પ્રવેશ આપવા દેવામાં આવતો નથી.

રાજ્યના ગૃહ વિભાગના સૂત્રોએ કહ્યું હતું કે ગ્રામ્ય સ્તરે પોલીસ દવારા નિયુક્ત ગ્રામ મિત્રની મદદથી જો કોઈ લોકડાઉનનો ભંગ કરતુ હોય તેની સામે કાર્યવાહી કરવા તથા ગામમાં જો કોઈને કોરોનાના લક્ષણો દેખાય તો પોલીસ ગ્રામમિત્રની મદદથી આરોગ્ય વિભાગને જાણ કરીને આવી વ્યક્તિની આરોગ્ય તપાસણી કરવામાં આવશે.

ગામના પ્રવેશદ્વારે પોલીસ ઉપરાંત ગ્રામમિત્રોનો પહેરો ગોઠવવામાં આવેલો છે. કોરોના વાયરસના સંક્રમણના કેસોની સંખ્યા ગુજરાતમાં વધતી જાય છે અને હવે લોકલ ટ્રાન્સમિશન ગ્રામ્ય વિસ્તાર સુધી પહોંચી ચૂક્યું છે. રાજ્યના 20 જિલ્લામાં વધતા-ઓછા પ્રમાણમાં કોરોના પોઝિટીવ કેસો સામે આવ્યા છે.

ગુજરાતના મુખ્ય શહેરોમાં પોઝિટીવ કેસોની સંખ્યા વધારે છે પરંતુ ગ્રામ્ય વિસ્તારમાં હજી ઓછી છે. કચ્છ, ગીર-સોમનાથ, પોરબંદર, પંચમહાલ, પાટણ, છોટાઉદેપુર, મોરબી, આણંદ, સાબરકાંઠા, દાહોદ, ભરૂચ અને બનાસકાંઠા કોરોનાની ઝપટમાં છે. ગ્રામ્ય વિસ્તારમાં પાટણમાં સૌથી વધુ 14 કેસો સામે આવેલા છે, જ્યારે બીજા ગ્રામ્ય વિસ્તારમાં કુલ કેસોની સંખ્યા 38 થવા જાય છે.