વિશ્વના પ્રત્યેક દેશોએ ભૂતાનનો દાખલો કેમ લેવો જોઇએ? જાણો ટુરિસ્ટ દેશનું રહસ્ય…

ગાંધીનગર– વિશ્વના 210 દેશોમાં કોરોના વાયરસ ફેલાયલો છે. સૌથી વધુ કેસ અમેરિકામાં થયાં છે જ્યારે ભૂતાનમાં માત્ર પાંચ કેસો પૈકી બે કેસમાં રિકવરી છે, એટલે આ દેશમાં સૌથી ઓછા ત્રણ કેસ પોઝિટીવ અને લાઇવ છે, જ્યારે નેપાળામાં બાર કેસ પોઝિટીવ છે જે પૈકી બે કેસમાં રિકવરી આવી છે. પ્રવાસન સ્થળ એવા આ બન્ને દેશોમાં મૃત્યુઆંક ઝીરો છે.

વિશ્વમાં ભૂતાનને ટુરિસ્ટ પ્લેસ કહેવામાં આવે છે. દક્ષિણ એશિયાનું તે સૌથી મોટું ટુરિસ્ટ પ્લેસ છે. વિદેશથી ઘણાં લોકો આવીને ભૂતાનમાં રહેતા હોય છે. કુદરતના ખોળે ભારતની નજીકમાં આવેલા આ દેશમાં કોરોના સંક્રમણના સૌથી ઓછા કેસ નોંધાયા છે. ભૂતાન સરકારની અધિકૃત વેબસાઇટમાં જણાવાયા પ્રમાણે આ દેશમાં પાંચ કેસ થયા હતા જે પૈકી બે પોઝિટીવ દર્દીઓ સાજા થઇ ગયા છે.

ભૂતાનમાં કોરોનાની તપાસ કરવા માટે 48 ક્લિનિક મોજૂદ છે. આ દેશમાં અત્યાર સુધીમાં 30,000 લોકોનું સ્ક્રીનિંગ કરવામાં આવ્યું છે જે પૈકી તમામનો રિપોર્ટ નેગેટીવ આવ્યો છે. ભૂતાન સરકારે સખ્ત ક્વોરેન્ટાઇન પોલિસી બનાવી છે. વાયરસથી સંક્રમિત લોકોની સતત તપાસ કરવામાં આવે છે. ચીનમાં ફેલાયેલા કેસો પછી તુરત જ ભૂતાને તકેદારીના પગલાં લીધા હતા.

ભૂતાનમાં બે પ્રકારના ક્વોરેન્ટાઇન સેન્ટર છે. એક તો ઘર અને બીજી હોસ્પિટલ. શંકાસ્પદ દર્દીઓને આ બન્ને જગ્યાએ રાખવામાં આવે છે. ક્વોરેન્ટાઇન એટલે લોકડાઉન એવો અર્થ ભૂતાનમાં કરવામાં આવે છે. ઘરમાંથી બહાર જવા સિવાય કોઇ પ્રતિબંધ નથી. ભૂતાનના પ્રધાનમંત્રી ટ્વિટ કરીને ક્વોરેન્ટાઇનની સમયસીમા વધારે છે. આ દેશમાં પહેલો પોઝિટીવ કેસ 6ઠ્ઠી માર્ચે સામે આવ્યો હતો. આ કેસ થયા પછી ભૂતાને વિદેશી પ્રવાસીઓ પર પ્રતિબંધ મૂકી દીધો હતો. ભૂતાનની આવક ટુરિઝમ પર નિર્ભર છે છતાં કઠોર નિર્ણય લેવામાં આવ્યો હતો.

વિશ્વના કોરોનાના આંકડા પ્રમાણે કુલ 1796415 કેસ થયાં છે જે પૈકી 412102 કેસોમાં રિકવરી આવી છે. અત્યાર સુધીમાં વિશ્વમાં કુલ 110030 લોકોના મોત થયાં છે. વિશ્વમાં એક્ટિવ કેસોની સંખ્યા 1274283 છે. તમામ દેશોમાં ચાર ટકા એટલે કે 50525 કેસો સિરીયસ અથવા તો ક્રિટીકલ કન્ડીશનમાં છે. વિશ્વનો મૃત્યુઆંક એવરેજ 21 ટકા નોંધાયો છે.

વિશ્વના દેશોમાં જ્યાં સૌથી વધારે 533470 કેસો છે ત્યાં અમેરિકામાં 20595 લોકોના મોત થયાં છે. અમેરિકા પોઝિટીવ કેસો અને મૃત્યુઆંક બન્નેમાં નંબરવનના સ્થાને છે. અમેરિકામાં અત્યાર સુધીમાં 30523 લોકો રિકવર થયાં છે. યુએસમાં સૌથી વધુ 181000 કેસો એકલા ન્યૂયોર્કમાં છે.