કામદા એકાદશી ચૈત્રી સુદ અગિયારસે આવે છે. આ દિવસે ભગવાન વાસુદેવનું પૂજન કરવામાં આવે છે. આ વર્ષે આ વ્રત 4 એપ્રિલ, શનિવારે કરવામાં આવશે. આ વ્રતમાં ભગવાન વિષ્ણુની પૂજા કરવામાં આવે છે. ભક્ત આ દિવસે શ્રદ્ધાપૂર્વક અન્નદાન કરી શકે છે. આ વ્રતમાં ભગવાન વિષ્ણુની પૂજા કરવામાં આવે છે અને કથા સાંભળવામાં આવે છે. કામદા એકાદશીની કથા ભગવાન શ્રીકૃષ્ણએ ધર્મરાજ યુધિષ્ઠિરને સંભળાવી હતી.
પૌરાણિક કથાઃ-
- ધર્મરાજ યુધિષ્ઠિરે ભગવાન શ્રીકૃષ્ણને ચૈત્ર સુદ એકાદશી વિશે પૂછ્યું ત્યારે શ્રીકૃષ્ણએ જણાવ્યું કે, આ કથા પહેલાં વશિષ્ઠ મુનિએ રાજા દિલીપને સંભળાવી હતી.
- રત્નપુર નામના નગરમાં પુંડરિક નામનો રાજા હતો. તેના રાજ્યમાં અપ્સરાઓ અને ગંધર્વ પણ રહેતાં હતાં. તેમાં લલિત અને લલિતા નામના ગંધર્વ પતિ-પત્ની પણ હતાં. બંને એકબીજાને ખૂબ જ પ્રેમ કરતાં હતાં.
- એક દિવસ રાજાની સભામાં નૃત્ય સમારોહ થયો, જેમાં ગંધર્વ લલિત સભામાં ગાઇ રહ્યો હતો, પરંતુ આ દરમિયાન તે પત્નીની યાદમાં ખોવાઇ ગયો, જેનાથી તેના સુર ખરાબ થઇ ગયાં.
- કર્કોટ નામના નાગે આ ભૂલને સમજીને રાજાને જણાવી દીધી. જેથી રાજાને ગુસ્સો આવ્યો અને લલિતને શ્રાપ આપીને એક વિશાળકાય રાક્ષસ બનાવી દીધો.
- પતિની આ સ્થિતિને જોઇને લલિતાને ખૂબ જ દુઃખ થયું. તે પણ રાક્ષસ યોનિમાં આવીને પતિની આ પીડાથી મુક્તિનો રસ્તો શોધતી રહી.
- એક દિવસ તેણે શ્રૃંગી ઋષિને આ વિશે જણાવ્યું. તેમણે કહ્યું કે, ચૈત્ર સુદ એકાદશી તિથિ આવશે. આ વ્રતને કામદા એકાદશી કહેવામાં આવે છે. આ વ્રતનું વિધિપૂર્વક વ્રત કરવાથી તારા પતિને રાક્ષસી જીવનમાંથી મુક્તિ મળી શકે છે.
- લલિતાએ ઋષિ શ્રૃંગીના જણાવ્યાં પ્રમાણે વ્રત કર્યું. જેનાથી તેના પતિને રાક્ષસ યોનિમાંથી મુક્તિ મળી ગઇ.
- અજાણતાં કરેલાં અપરાધ અથવા પાપના ફળથી મુક્તિ મેળવવા માટે આ વ્રત કરવામાં આવે છે.
