GSTના નીચા રેટને કારણે લક્ઝરી કાર કંપનીઓને ‘ચાંદી’

નવી દિલ્હી:લક્ઝરી કારના વેચાણની ગાડી ફરી ‘ટોપ ગિયર’માં ચાલવા માંડી છે. GSTમાં અણધાર્યા લાભને કારણે કંપનીઓને 2017માં 10 ટકા અને એથી વધુ વૃદ્ધિનો અંદાજ છે. આમ તો વિવિધ ક્ષેત્રો પર GSTની વાસ્તવિક અસરનું વિશ્લેષણ થઈ રહ્યું છે અને આગામી સમયમાં પણ ચાલુ રહેશે. જોકે, લક્ઝરી કાર પરના ટેક્સ રેટને કારણે કંપનીઓ અત્યારથી જ ખુશ છે.

દિલ્હી અને આસપાસના વિસ્તારોમાં વર્ષના પ્રથમ અર્ધવાર્ષિક ગાળામાં મોટાં ડીઝલ વાહનોના વેચાણ પર પ્રતિબંધ અને ડિમોનેટાઇઝેશનને કારણે 2016માં રૂ.25 લાખથી રૂ.2 કરોડની કિંમતની કાર અને SUVsનું વેચાણ પહેલી વખત ઘટ્યું હતું. હવે 2017માટે ઉદ્યોગના જાણકારો વેચાણમાં 15 ટકા વૃદ્ધિની આગાહી કરી રહ્યા છે, જે SIAMએ જાહેર કરેલા ઓટો સેક્ટરના 7-9 ટકાના વૃદ્ધિદર કરતાં વધારે છે.

અત્યારે લક્ઝરી વાહનો 55 ટકા જેટલો ઊંચો ટેક્સ ચૂકવે છે. જેમાં કેન્દ્ર, રાજ્ય અને જુદાં જુદાં શહેરોના ટેક્સ સામેલ છે. GST હેઠળ લક્ઝરી કાર પર 15 ટકાના લક્ઝરી સેસ સાથે કુલ 43 ટકા ટેક્સ રહેશે. ટેક્સનો દર સૂચવે છે કે, પહેલી જુલાઈથી GSTના અમલ સાથે લક્ઝરી કાર સસ્તી થશે.

જોકે, કાર કંપનીઓએ તો GSTના રેટની જાહેરાત પછી તરત ભાવમાં રૂ.11 લાખનો ઘટાડો કર્યો છે. જેનું કારણ સંભવિત ખરીદદારોને આકર્ષવાનો છે. મર્સિડિઝ-બેન્ઝ ઇન્ડિયાના એમડી રોલેન્ડ ફોલ્ગરે જણાવ્યું હતું કે, અમે GSTના નીચા દરનો લાભ ગ્રાહકોને આપ્યો હોવાથી નોંધપાત્ર પ્રતિસાદ મળ્યો છે. પૂછપરછમાં મોટી સંખ્યામાં વધારો થયો છે.

2016નું વર્ષ સારું રહ્યું ન હતું. 2017ના પહેલા પાંચ મહિના સારા રહ્યા છે અને ગયા વર્ષના વેચાણની ઘટ સરભર થવાની પ્રબળ શક્યતા જણાય છે. મર્સિડિઝ-બેન્ઝને 2017માં વેચાણ 10 ટકા કે વધુ દરે વધી 13,200 યુનિટ્સ થવાનો અંદાજ છે.

ઔડી, જગુઆર લેન્ડ રોવર અને વોલ્વોને ચાલુ વર્ષે સારા વેચાણની આશા છે. ઔડી ઇન્ડિયાના વડા રાહિલ અંસારીએ જણાવ્યું હતું કે, કંપનીને મળેલી ફીડબેકના આધારે વેચાણમાં 10 ટકા કે વધુ વૃદ્ધિની શક્યતા જણાય છે.

ઉલ્લેખનીય છે કે, ઔડીએ ભારતમાં બનેલાં વાહનોના ભાવમાં રૂ.10 લાખ સુધીનો ઘટાડો કર્યો છે. અંસારીના જણાવ્યા અનુસાર ભાવમાં ફેરફારના નિર્ણય પહેલાં પણ માગ સારી હતી અને છેલ્લા કેટલાક સમયમાં તેમાં વધુ સુધારો નોંધાયો છે. અંસારીએ જણાવ્યું હતું કે, GSTના લાભને કારણે ડીલર્સની પૂછપરછમાં વધારો થયો છે અને તેનું વેચાણમાં રૂપાંતર પણ થઈ રહ્યું છે.

JLRએ ભારતમાં બનતાં પાંચ મોડલ્સના ભાવમાં 12 ટકા સુધી ઘટાડો કર્યો છે. ઔડી પણ ચાલુ વર્ષે સ્થાનિક બજારમાં 10 મોડલ લોન્ચ કરવાની યોજના ધરાવે છે અને કંપનીને આશા છે કે, આગામી 10 વર્ષમાં ભારત તેનાં ટોચનાં 10 બજારોમાં સ્થાન પામશે.

Share

Satyaday, Gujarat’s largest language media group, brings to you the most comprehensive Gujarati News Website. The app covers Latest Gujarati news from all around the world giving you a complete up-to-date coverage on news anytime and anywhere.

Twitter Auto Publish Powered By : XYZScripts.com